Canto máis temos
que esperar?

Hai unha semana comunicóusenos que a terceira praza de apoio da EEI Vila Laura sería dotada.

Recibimos aquela noticia con alivio e confiamos en que a solución anunciada se materialice. Pero, a día de hoxe, a mestra aínda non se incorporou ao centro e seguimos sen unha data concreta para a súa chegada.

Levamos semanas reclamando, preguntando e utilizando os diferentes cauces ao noso alcance para conseguir que Vila Laura dispoña do persoal que necesita.

Concentración, cacerolas e pitos

Desde a ANPA Magnolia convocamos ás familias a unha concentración pacífica o venres 25 de setembro ás 8:45 h, antes da entrada ao colexio, na Porta Moreira.

Queremos facer unha mobilización breve, respectuosa e visible. Animamos ás familias a participar e a traer cacerolas e pitos para facernos escoitar.

A reclamación é moi sinxela: queremos que se faga efectiva canto antes a incorporación da terceira mestra de apoio.

Non protestamos contra o cole. Protestamos polo cole.

Esta mobilización non se dirixe contra a EEI Vila Laura, o seu equipo directivo nin o seu profesorado.

Todo o contrario. Queremos tamén visibilizar o esforzo que están realizando os profesionais do centro para manter o funcionamento diario con menos persoal do necesario.

A falta dunha mestra de apoio reduce a capacidade do centro para responder ante ausencias, incidencias ou varias necesidades simultáneas. E a solución non pode consistir en retirar sistematicamente outros apoios para cubrir os ocos que deixa a falta de persoal.

Non queremos que se quite atención a unhas crianzas para poder atender a outras. Queremos que todas teñan os recursos que necesitan.

Se a situación cambia, informarémosvos

Seguiremos pendentes de calquera novidade. Se antes do venres se produce a incorporación da mestra ou existe algún cambio relevante na situación, informarémolo inmediatamente ás familias.